最近天氣差, 卒之元旦日前就病咗, 一直病到2號先有得醫生睇。一早打去家庭醫生度掛號, 護仕姑娘就話我個籌要排到百幾, 我以為自己病到聽錯, 仲答佢「嘩, 排第8咁快? 我黎唔切喎..」姑娘好快糾正我話:「慢慢喇, 你係排122呀~ 下午4點再打黎, 到時睇下仲差幾多個到你!」
講到咁, 抖到食晝時候, 好辛苦一支公出去睇下咩情況! 出到去發現今日好多人睇醫生, 基本上間間醫務所都排滿輪候嘅病人, 但有營業嘅醫務所, 其實得一半! 而一半當中, 真係做足全日既, 又只有一半! 因為另一半醫生, 只開下午, 而最早一位亦只由下午3點先開門, 而且幾乎全部門口都貼上「今天額滿」的告示。所以肯開全日嘅醫生, 基本上全日應該有百零二百個掛號輪緊等睇醫生! 如果進取啲, 肯做夜啲的話, 我估計肯開全日嘅醫生, 單一日收入應該非常之和味!!
當自己坐喺度等睇醫生, 睇住來來去去既病人及護仕姑娘嘅忙碌時, 不其然自己就計下今日醫生由叫病人入房診症, 到護仕姑娘俾藥病人然後收診金嘅速度大概要幾耐, 想用黎計算一下今日醫務所嘅收入究竟有幾和味。
結果計算如下 : 診金每位 $320, 診症速度約10分鐘一個, 咁一個鐘頭大約可以睇 6 個病人, 即係 $320 x 6= $1920..以原本應診時間計, 即9am-1pm然後3pm-7pm, 總共8個鐘計, 收入就係 $1920 x 8 = $15,360...但如果今日肯做多3個鐘的話, 賬面收入就係 $21,120..不過估計哩個亦係今日做到最盡嘅收入!! (P.S. 診金某啲醫生會收得高啲, 得出總額會有所不同, 但時間值可變性就好低)
當然上述只係賬面數, 但實際醫務所今日賺幾錢哩? 咁我就上醫管局 check 下醫生大概薪酬黎參考一下, 得到結果大概係, 公立醫院駐院醫生, 由每月底薪5萬到顧問醫生每月底薪20萬不等。而護仕姑娘方面, 醫務所姑娘可以唔需要有護仕注冊資格, 但基本藥物名稱理解都需要, 不過最低要求可以只係文職背景就可以做, 所以起薪點由萬二蚊開始到兩萬蚊都有。
而醫務所方面, 我幫襯開嗰間, 位於商場入面, 大約百零到唔夠二百呎, 租金參考返商場廣告, 估計大概每月由五萬蚊至八萬蚊左右, 視乎位置。而哩間醫務所位置處於非當眼位, 估計大約月租$65,000左右。至於燈油火脂 + 入貨成本, 粗畧估計大约$30,000左右。
估計醫務所醫生月薪$200,000 (1個計), 護仕姑娘每個約 $20,000 (3個平均計)...咁 total 一個月開支就係 :
$200,000 + $20,000 x 3 + $65,000 + $30,000 = $355,000
而每日 (以24日計, 因為每個星期六得半日應診) 就係 $355,000 / 24 = $14,792 左右。
有咗每日成本條數, 咁今日淨收入就好易計, 即係 $21,120 - $14,792 = $6,328, 算係非常可觀既收入! 而且每年最少有一、兩次哩啲機會做到停唔到手, 加上原來市場好多對手都「唔志在」哩啲黄金時段, 咁勤力啲, 就自然揾到一份豐厚回報去過年~ 而最重要既係, 赢到客人一份既信心, 回頭幫襯嘅會亦大好多, 即係搶到生意機會又大咗!!
所以我覺得, 六千幾蚊嘅純利唔係最重要, 反而「品牌價值」先係最緊要, 因為明明大家賣嘅野一樣, 推銷廣告方面, 大家亦受到同一限際; 來貨估計亦受制於同一個系統, 所以貨價差别不大; 至於員工人工方面, 市場大致亦差不多, 反而最大差别係醫生自己點訂定自己既薪酬, 黎平衡醫務所既收入而巳。因此真正能突圍而出既, 就係做市場需要既野, 由客人觀點出發, 而非由自己角度去諗, 因為主觀願望, 往往係跟市場同現實背道而馳!!
沒有留言:
發佈留言