籠裏雀。籠外雀

籠裏面生活既雀同籠外面生活既雀, 分別除咗外型及毛色之外, 最大唔同嘅係思想! 籠裏雀因為長久以來都不仇衣食, 而且又有個籠保護, 所以好多時都以為自己比起外面既雀優越! 什至以為個籠就係天下! 一切風風雨雨都係籠外既事, 自己在籠內係一種好命清高既貴族!

有啲什至以為自己天下無敵, 以為就算飛出籠外都會係百雀之首! 又有啲雀 (亦係絕大部份) 希望生於籠, 屎(死) 於籠就夠。因為佢地生命裏面, 除咗食同疴, 頂多都係整理下啲毛, 裝吓身, 唱下歌咁就一世! 又有啲, 除咗食同疴, 佢地基本乜都唔想做, 只係想飽得實在, 睡得可愛就夠! 最後亦係佔最少數嘅一啲雀, 會希望為個籠出分力, 希望大家住得開心又舒服, 所以往往自找忙碌, 食得少又睡得少, 營營役役一世雀, 所以一般哩類雀都會比較毛色差兼身子弱!

但在籠外雀眼中, 籠裏雀其實全部都係一樣, 即係一班「井底蛙」! 籠外雀明白壽命一般可能會比籠裏雀短, 所以籠外雀會對自己每一刻生命都好珍惜, 因為下一秒分分要面對危險, 又冇瓦庶頭兼隨時餐餐都可能食唔得飽, 更莫講話食得好唔好, 有時嗰種飢餓感, 係籠裏雀一世都唔會明白! 加上在真正大自然面前, 籠外雀好明白自己係非常非常之渺小, 所以對大自然一切都會非常尊敬, 識得活在當下嘅生活道理, 明白欣賞生命嘅每一刻, 所以根本唔識得諗咩叫優越感, 什至唔知咩叫貴唔貴族。

但生命本身就無所謂「籠裏雀」或「籠外雀」, 因為生命就係生命! 而生命本身就係一種進程, 既冇高低上下左右之分, 亦無貴濺可言! 但生命就有快樂同痛苦之分, 而痛苦就係來自比較, 雖然有時「比較」會好似得來一時嘅快慰, 但其實只係「無知」產生出來嘅感覺而巳, 所以好快就會過去!

但係如果開始咗「比較」, 就會沒完沒了咁繼續落去, 直至尋找到無窮無盡嘅煩腦及痛苦, 然後完全停不了咁繼續「比較」, 希望揾到下一個「無知的快感」, 換黎無間不休嘅情况!
雖然要快樂有好多種方法, 但最基本就係盡量去減少「比較」, 咁起碼會少咗好多頭痛! 就好似籠裏雀可以不自大, 籠外雀又不自悲, 咁就可以有多一分寧靜, 少一分煩惱, 自然就活得自在多一啲。